ದೀಪವು ನಿನ್ನದೆ ಗಾಳಿಯು ನಿನ್ನದೆ

ಭಾವಗೀತೆ 

ದೀಪವು ನಿನ್ನದೆ, ಗಾಳಿಯು ನಿನ್ನದೆ,

ಆರದಿರಲಿ ಬೆಳಕು

ಕಡಲು ನಿನ್ನದೆ, ಹಡಗು ನಿನ್ನದೆ,

ಮುಳುಗದಿರಲಿ ಬದುಕು ।।ಪ।।

ಬೆಟ್ಟವು ನಿನ್ನದೆ, ಬಯಲು ನಿನ್ನದೆ,

ಹಬ್ಬಿ ನಗಲಿ ಪ್ರೀತಿ

ನೆಳಲೋ, ಬಿಸಿಲೋ ಎಲ್ಲವೂ ನಿನ್ನವೆ,

ಇರಲಿ ಏಕರೀತಿ ।।ದೀಪವು ನಿನ್ನದೆ।।

ಆಗೊಂದು ಸಿಡಿಲು, ಈಗೊಂದು ಮುಗಿಲು,

ನಿನಗೆ ಅಲಂಕಾರ

ಅಲ್ಲೊಂದು ಒಂದು ಹಕ್ಕಿ, ಇಲ್ಲೊಂದು ಮುಗುಳು,

ನಿನಗೆ ನಮಸ್ಕಾರ ।।ದೀಪವು ನಿನ್ನದೆ।।

ಅಲ್ಲಿ ರಣ ದುಂದುಭಿ, ಇಲ್ಲೊಂದು ವೀಣೆ,

ನಿನ್ನ ಪ್ರತಿಧ್ವನಿ,

ಆ ಮಹಾಕಾವ್ಯ, ಈ ಭಾವಗೀತೆ,

ನಿನ್ನ ಪದಧ್ವನಿ ।।ದೀಪವು ನಿನ್ನದೆ।।

ದೀಪವು ನಿನ್ನದೆ, ಗಾಳಿಯು ನಿನ್ನದೆ,

ಆರದಿರಲಿ ಬೆಳಕು

ಕಡಲು ನಿನ್ನದೆ, ಹಡಗು ನಿನ್ನದೆ,

ಮುಳುಗದಿರಲಿ ಬದುಕು.

    ----------ಂ----------

ಸಾಹಿತ್ಯ : ಕೆ.ಎಸ್. ನರಸಿಂಹಸ್ವಾಮಿ

ಸಂಗೀತ : ಸಿ ಅಶ್ವಥ್

ಗಾಯನ : ಎಸ್ ಜಾನಕಿ